༄༅།། །།འཕགས་པ་སྤྱན་རས་གཟིགས་ཀྱི་སྒོ་ནས་མིག་གི་ཉེས་སྐྱོན་སེལ་བའི་གདམས་པ་ཟུག་རྔུ་ཚ་གདུང་སེལ་བའི་ཟླ་ཟེར་ཞེས་བྱ་བ་བཞུགས་སོ།།

རྒྱལ་ཀུན་སྙིང་རྗེའི་རང་གཟུགས་ལྷག་པའི་ལྷ།   སྤྱན་རས་གཟིགས་དབང་ཞབས་ལ་གུས་བཏུད་ནས།  དབང་པའི་དངས་མ་མིག་གི་ཟུག་རྔུ་ཀུན། སེལ་བྱེད་གདམས་པའི་སྙིང་པོ་འདི་ན་བྲི།  དེ་ལ་ཐོག་མར་རང་ཉིད་བདེ་བའི་སྟན་ལ་འཁོད་དེ།  ཁྲུས་དང་གཙང་སྦྲ་སྔོན་དུ་འགྲོ་བས། སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྤྱི་ལྟར་བྱ།  

དེ་ནས་འདི་ལྟར་གསལ་བཏབ་པར་བྱའོ།  བདག་ལུས་ཐ་མལ་གནས་པའི་སྤྱི་བོ་རུ།  པཾ་ལས་པདྨ་ཨ་ལས་ཟླ་དཀྱིལ་སྟེང་།  ཧྲཱི༔ཡིག་དཀར་པོ་འོད་ཟེར་འཕྲོས་པ་ལས། ངོ་བོ་དྲིན་ཆེན་རྩ་བའི་བླ་མ་དང་། དབྱེར་མེད་འཕགས་མཆོག་སྤྱན་རས་གཟིགས་དབང་ཕྱུག། ཤེལ་དཀར་ཞུན་མའི་མདངས་ཅན་ཞི་འཛུམ་ཉམས། ཕྱག་གཡས་མཆོག་སྦྱིན་གཡོན་པས་བདེ་དཀར་འཛིན། རི་དྭགས་ལྤགས་པའི་ག་ཤལ་རིན་ཆེན་བརྒྱན། དར་གྱི་སྨད་གཡོགས་ཞབས་གཉིས་མཉམ་སྟབས་བཞེངས། སྐུ་ལས་སྐྱེས་པའིི་འོད་ཕུང་དབུས་ན་བཞུགས། དེ་ཡི་གནས་གསུམ་ཡིག་འབྲུ་གསུམ་མཚན་པའི། ཐུགས་ཀའི་ལས་འཕྲོས་འོད་ཟེར་གྱིས། ཡེ་ཤེས་སེམས་དཔའ་དབང་གི་ལྷ་དང་བཅས། སྤྱན་དྲངས་ཡི་དམ་དབྱེར་མེད་དབང་གི་ལྷས། དབང་བསྐུར་འོད་དཔག་མེད་ཀྱིས་དབུ་བརྒྱན་གྱུར། ཨོཾ་གུ་རུ་ཨརྱ་ཝ་ལོ་ཀི་ཤྭར་ཨརྒྷཾ་ནས་ཤཔྟའི་བར་གྱིས་མཆོད།  སྐྱོན་གྱིས་མི་གོས་ ཞེས་སོགས་ཀྱིས་བསྟོད། འཕགས་པའི་ཐུགས་ཀར་ཟླ་བའི་དཀྱིལམའཁོར་དབུས།  ཧྲི༔ཡིག་འབྲུ་དྲུག་སྔགས་ཀྱི་བསྐོར་བ་ལས། འོད་ཟེར་དཀར་གསལ་བདུད་རྩིའི་རང་བཞིན་འཕྲོས། རང་གི་མིག་ལ་ཕོག་པས་ཉེས་སྐྱོན་ཀུན། སངས་ཏེ་དག་ནས་འཕགས་པའི་ཡེ་ཤེས་ཀྱི། སྤྱན་དང་མཚུངས་པའི་འདྲེན་བྱེད་ཐོབ་པར་ཤོག། ཞེས་བརྗོད་ཅིང་བསམ་ལ། ཡིག་དྲུག་སྟོང་ཕྲག་བཟླས་མཐར། ཨོཾ་མ་ཎི་པདྨེ་ཧཱུཾ། ཨོཾ་གསལ་ལ་གསལ་ལེ་མུན་གསལ་ལེ་ཀུན་ཧྲིག་སྭཱ་ཧཱ།  ཞེས་པ་སུམ་བརྒྱ་རེ་མ་མཐའ་བྱས་ནས་བཟླ། དེ་ནས་ སྐྱབསམགསུམ་ཀུན་འདུས་བླ་མ་སྤྱན་རས་གཟིགས། གདུང་ཤུགས་དྲག་པོས་སྙིང་ནས་གསོལ་བ་འདེབས། བདག་གི་སྔོན་གྱི་ལས་དང་འཕྲལ་རྐྱེན་དུ། གྱུར་པའི་མིག་གིམཉེས་སྐྱོན་མ་ལུས་པ། བྱང་ཞིང་དག་ནས་འཕགས་པའི་ཡེ་ཤེས་ཀྱི། སྤྱན་དང་མཚུངས་པ་ཐོབ་པ་བྱིན་གྱིས་རློབས། ཞེས་ལན་བདུན་ལ་སོགས་དད་གུས་ཤུགས་དྲག་པོའི་སྒོ་ནས་བརྗོད་པས། འཕགས་པས་རང་གི་མིག་ཏུ་ལྗགས་མཆིལ་བཏབ་པས། མིག་གི་ཉེས་སྐྱོན་ཐམས་ཅད་མཁའ་ལ་ཆུ་འཛིན་དྲངས་པ་བཞིན་དུ་སོང་བར་བསམ་ལ། སྲིན་ལག་གཡོན་པར་མཆིལ་མ་བཏབ་ལ་རང་གི་མིག་ཏུ་བྱུགས། མཇུག་ཏུ། བླ་མ་སྤྱན་རས་གཟིགས་རང་གི་སྤྱི་བོར་ཐིམ་པར་བསམ་ཞིང་། བསྔོ་སྨོན་གྱི་རྒྱས་གདབ་བོ། དེ་ལྟ་བུའི་ཚུལ་གྱིས་ནང་རེ་བཞིན་གཞན་དང་ངག་མ་འདྲེས་པའི་གོང་དུ་ཆག་མེད་དུ་ཉམས་སུ་བླངས་ན། མིག་གི་ཉེས་སྐྱོན་ལས་གྲོལ་བ་ཐེ་ཚོམ་མེད་དོ། ཅེས་འཕགས་མཆོག་སྤྱན་རས་གཟིགས་ཀྱི་སྒོ་ནས་མིག་གི་ཉེས་སྐྱོན་སེལ་བའི་གདམས་པ་ཟུག་རྔུ་ཚ་གདུང་སེལ་བའི་ཟླ་ཟེར་ཞེས་བྱ་བ་འདི་ཡང་། དད་ལྡན་ཨ་མཆོད་སྒྲོལ་མ་འབུམ་ནས་མིག་གི་ཟུག་རྔུར་དམིགས་པའི་ཁ་འདོན་རྒྱུ་ཞིག་ཅི་ནས་ཀྱང་་དགོས་ཞེས་ང་སྐུལ་མ་བྱུང་བའི་དོང་། ༧ཤཱཀྱའི་དགེ་སློང་བློ་བཟང་ཆོས་ཀྱི་དབང་ཕྱུག་གིས་རང་གི་བསམ་གཏན་གྱི་ཁང་བུར་སྦྱར་བ་འདིས་ཀྱང་འགྲོ་ཀུན་སྒྲིབ་བྲལ་ཡེ་ཤེས་ཀྱི་སྤྱན་ཐོབ་པའི་རྒྱུར་གྱུར་ཅིག། དངོས་གྲུབ་གཏེར་མཛོད་ཀུན་མཁྱེན་ཙོང་ཁ་པ། དངོས་གྲུབ་འབྱུང་གནས་གསོལ་འདེབས་དམིགས་བརྩེ་མས། དངོས་གྲུབ་འགུགས་པའི་ལས་ཚོགས་བརྒྱ་རྩ་སོགས།དངོས་གྲུབ་སྒོ་འཕར་འབྱེད་ཕྱིར་མཁས་མང་གསུང་། རྣམ་དག་བསམ་པས་ཀུན་གྱི་སྤྱི་ནོར་དུ་། རྣམ་མང་ཕྱོགས་བསྒྲིགས་པར་གསར་བསྐྲུན་པའི་ཚེ། རྣམ་འདྲེན་ཐུབ་དབང་ཀླུ་སྒྲུབ་ཐོགས་མེད་སོགས་རྣམ་པ་སྐུ་ཡང་་་་་མགྲོན་གྱི་ཚུལ་དུ་བཀོད། བཀོད་པའི་བསོད་ནམས་དངོས་པོ་གང་ཐོབ་དེ།  དེ་ཡིས་གངས་ཅན་མཁས་གྲུབ་ཆུ་གཏེར་ལས། ལས་ཚོགས་མན་ངག་དབང་གི་རྒྱལ་པོའི་མཛོད་། མཛོད་བརྒྱ་འབྱེད་མཁས་ཆོས་ཀྱི་འཁོར་ལོས་བསྒྱུར། བསྒྱུར་མཛད་དམ་པས་ས་སྟེང་ཀུན་ཁྱབ་ཤོག། 

ཅེས་པ་འདི་ནི་དེང་སྟོབས་བསོད་ནམས་ཀྱིས་ཕྱུག་པ་་་་དགེ་སློང་བློ་བཟང་ཆོས་འཕེལ་ནས་ཐོ་ཡོན་བླ་མ་ཡབ་སྲས་ཀྱིས་ཕྱོགས་བསྒྲིགས་དམིགས་བརྩེ་མའི་བེ་འབུམ་དོན་གཉེར་ཀུན་གྱི་སྤྱི་ནོར་གཟིགས་བདེའི་སླད་དུ་པར་གསར་བཞེངས་སྐབས་པར་བྱང་། སྨོན་ཚིག་དགོས་ཞེས་བསྐུལ་ངོར་སྒོ་སློབ་དཔོན་ཁྲི་འཛིན་ནས་སྦྱར་བའོ། 

                                                        དགེ་ལེགས་འཕེལ།